|
SubscriptionsSites I Read
|
|
|
|
| 星期日晚多左隻貓. 話說菜小姐在小欖燒野食見到隻靚貓(英短), 抱黎玩左一陣, 諗住帶返黎既時候, 俾佢走甩左, 捉左成晚都捉唔到, 正值中秋節, 冇計, 返歸. 第二朝(星期日)一早起身又嚷著要捉貓, 最後聯絡到貓義工一齊入去(貓義工出示義工証, 就唔洗俾錢入左去). 菜小姐拎走左我罐好好味既applaws罐頭, 就咁, 隻英短就自投羅莽喇. 返到黎就梗係同我另外五隻一齊呼呼鳴鳴聲啦. (貓係可以張開個口叫到好似蛇咁, 我自己試過係唔得既) 攪左一大輪, 最後將我成間書房俾左佢做屋, 隔離住先. 第二晚同左佢去做body check, 噢, 要隔離兩個禮拜, 希望佢同麥麥可以和平相處啦. -- 近排都係早收工返屋企hea同休息, 自不然會睇電視唔想郁. 雖然套蔡鱷同雪條鳳仙就真係麻麻, 但係周海媚既演技就真係一流喇, 你睇下佢喊既時候, 下唇係震晒嫁, 而上唇係唔郁嫁, 利害利害. 至於有型主婦小品劇, 做做下又做到廿幾集, 真係估唔到. -- | | |
| 禽日終於睇晒prison break喇, 睇晒4個season, scofield 最後死左, 明明話醫好左, 都要話佢死左, 應該係唔想其他人再作呢個故仔, 即係好似harry potter開頭有傳會寫到harry會死. 呢個season都係一般般, 好似草草收場. 整個kellerman出黎就收左場. 睇咁多最好睇都係season 3.
--
經歷能者多勞後, 終於多勞多得喇. 蝕左賺返.
--
波仔飯既粟米好難食
--
| | |
| 一日之內走左四個地盤, 先去薄扶林VTC試野, 試heat頭smoke頭拎手流水掣分層掣. 攪掂之後再去牛奶公司清defects. 再落直升機場偷放水. ( <~ 不過俾人發現左, 俾人屌左幾句, 話我掛牌唔通知聲) , 最後去左干德道幫手試野驗消防. 這就是工程 !!!! 做十仔體力上既辛苦都唔算得係d乜, 最麻煩就係要應付d濕尻顧問, 顧問好多都唔精消防野, 又俾唔到設計, 唔識野就唔好咁多聲氣. 個設計又一d都唔practical. 又唔敢批野, 就算批都係加句: as long as fulfill FS GS & E GS. 咁要你顧問黎做乜先. 張251又係我地出, 有咩消防野有問題又係我地食. 無奈.... 我大佬話齋: 工程本身唔難做, 最難就係應付d衰人! | | |
| 返呢份工都返左一年幾, 不知不覺已離開舊公司咁耐, 好多之前公司既麻煩野都已經離我而去, 只係剩低唔可以聽冇來電顯示電話呢個要點, 唔想再同舊公司有咩接喇, 因為諗返起果段日子實在太唔開心喇, 日做夜做都做唔晒, 加上做到冇同事, 放工又晏, 老細又冇乜品, 所以比較起上黎而家呢份工真係超好(加上人工多左一截). 再講下而家做工程, 真係要捱得, 我入左黎做之後, 前前後後走左13個人, 當中大部份人都係覺得辛苦, 成日落地盤身水身汗, 仲要捱得比人屌, 冇返咁上下面皮又點頂得順呢. 不過我就覺得我都算係適合做工程, 至少我覺得自己都叫做吹得, 而家更要做到講大話唔口疾. 起到貨過到海就係神仙, 當然都會有返工程道德操守既. 做工程最好既地方就係比較自由, 可以周圍去, 唔駛成日坐係公司, 當然有時熱到爆炸都要出去啦. 咁自由當然可以蛇王啦, 只係冇穫冇投訴, 有同事成個禮拜唔見人都冇問題. 當做完一單仆直之後就真係幾有成功感, 睇住d野由冇變有. 試到d野係work, 驗到消防. 究竟咩係"星角"呢, 原來係講緊star-delta, 3-phase d 東東, 不過始終大學學既野係工作上既應用一d都唔多. 好鬼多野都唔記得晒, 落去地盤見到d電燈仔做既野, 咩掣櫃發電機丫, 其實係應該要識既, 不過點解唔識既, 早知讀好d書(不過都係會唔記得嫁喇). 如果比個380V你, 比埋個power你, 咁究竟點計個current出黎呢? P=VI !!!??? 咁個開方3呢!!?? 噢, 讀完大學等於冇讀. starting current 又點計呢 !!?? 諗諗下都唔知大學讀過d乜, 只係記得有科記engineers & society 我拎左個A+ 同埋 fundamental of electrical engineering 拎左個 D+ (by YF Fung). 不過年終仆直 (also by YF Fung) 都有 B. 渾渾噩噩就咁四年, 像在橋牌中渡過 (而家就係麻雀中渡過). 工程五大招!!!!!推側閃避瀉!!!!! 係你既都變唔係你既, 唔係你既更加唔係你既. 祝各工程界既同學工作愉快!!!! | | |
|
